မေလ ၂၃ ရက်
မြန်မာနိုင်ငံမှ ပြည်ပသို့ Overseas လမ်းကြောင်းမှတစ်ဆင့် သစ်နှင့် သစ်အချောထည် ပစ္စည်းများ တင်ပို့ရာ၌ ဆိပ်ကမ်းတွင် အကောက်ခွန် ဦးစီးဌာန၏ စစ်ဆေးခံရမှုကို ကင်းလွတ်ခွင့် ရရှိသွားပြီဖြစ်ကြောင်း မြန်မာနိုင်ငံ သစ်လုပ်ငန်းရှင် အသင်းမှ သိရှိရသည်။
ယခင်က ပြည်ပသို့ သစ်နှင့် သစ်အချောထည် ပစ္စည်းများ တင်ပို့ရန်အတွက် သစ်အခြေခံ ပစ္စည်းများအား စက်ရုံ၌ ထုပ်ပိုးစဉ် တစ်ကြိမ်၊ ဆိပ်ကမ်း၌ တစ်ကြိမ် စစ်ဆေးမှု ခံယူရကြောင်း၊ ယင်းသို့ စစ်ဆေးခြင်းကို သစ်တောဦးစီးဌာနနှင့် အကောက်ခွန် ဦးစီးဌာနတို့ ပူးပေါင်းဆောင်ရွက်ခြင်း ဖြစ်ကြောင်းလည်း သိရှိရသည်။
"ပြည်ပကို သစ်နဲ့ သစ်အချောထည် ပစ္စည်းတွေ တင်ပို့မယ်ဆိုရင် စက်ရုံမှာ Packing ထုပ်နေတုန်း တစ်ခါစစ်တယ်။ ဆိပ်ကမ်းရောက်တော့ ကွန်တင်နာဖောက်ပြီး အကောက်ခွန်က စစ်တယ်။ အခုတော့ ဆိပ်ကမ်းမှာ စစ်ဆေးမှုကို ကင်းလွတ်ခွင့် ရသွားပါပြီ။ ဒါကို သစ်တောဦးစီးဌာနနဲ့ အကောက်ခွန် ဦးစီးဌာနတို့ ညှိနှိုင်းဆုံးဖြတ်ပြီး စက်ရုံမှာပဲ သစ်တောဦးစီးဌာနက စစ်ပြီး၊ ချိပ်ပိတ်ပြီး ဆိပ်ကမ်းကို သွားမယ်။ ပြီးတော့ ပြည်ပတင်ပို့မယ်" ဟု မြန်မာနိုင်ငံ သစ်လုပ်ငန်းရှင် အသင်းမှ တာဝန်ရှိသူ တစ်ဦးက ပြောကြားခဲ့သည်။
ယင်းကဲ့သို့ သစ်စက်ရုံတွင် သစ်တောဦးစီးဌာန၏ စစ်ဆေးမှု ခံယူအပြီး ပြည်ပသို့ တိုက်ရိုက်တင်ပို့နိုင်ခြင်းကို ၂၀၁၃ ခုနှစ် ဇွန် ၁ ရက်တွင် စတင်ပြုလုပ်သွားမည် ဖြစ်ကြောင်းလည်း သိရှိရသည်။
အထက်ပါ ကိစ္စရပ်နှင့် စပ်လျဉ်းပြီး ပြည်ပသို့ သစ်တင်ပို့နေသည့် ကုမ္ပဏီများမှ လုပ်ငန်းရှင်များနှင့် မြန်မာနိုင်ငံ သစ်လုပ်ငန်းရှင် အသင်းတို့ တွေ့ဆုံပွဲကို မေ ၂၀ ရက်က ကျင်းပခဲ့ကြောင်း သိရှိရသည်။
"Custom က ICT 2 မှာ မစစ်တော့ဘူး ဆိုပေမယ့် မသင်္ကာစရာ တွေ့ရင်တော့ ကွန်တင်နာ ဖောက်စစ်သွားမယ်လို့ သိရပါတယ်။ ဒီစနစ်အရ ဆိုရင်တော့ သစ်တောဦးစီးဌာနရဲ့ စစ်ဆေးမှုကိုသာ ခံယူရမှာဖြစ်ပြီး X Rays တန်းဖြတ်ရုံပဲ။ အရင်က စက်ရုံမှာ တစ်ခါစစ်၊ ဆိပ်ကမ်းမှာ ကွန်တင်နာဖောက်ပြီး တစ်ခါထပ်စစ်ဆိုတော့ ကြန့်ကြာတာတွေ ရှိခဲ့တာပေါ့။ အခုတော့ ကြန့်ကြာမှုတွေ မရှိအောင် အကောက်ခွန် စစ်ဆေးမှု ကင်းလွတ်ခွင့် ပေးလိုက်တာပါ" ဟု သစ်စက်ရုံ လုပ်ငန်းရှင်တစ်ဦးက ပြောကြားခဲ့သည်။
EMG
No comments:
Post a Comment