7.9.2013
နိုင်ငံရေး လုပ်သည်ဟုဆိုကာ ရန်ကုန်တိုင်းဒေသကြီး ဗဟန်းမြို့နယ်
၅/မြောက်ရပ်ကွက် အလယ်ကျောင်းကြီး လိပ်ပြာကန်ကျောင်းတိုက်မှ
စာချသံဃာတစ်ပါးကို နေထိုင်သီတင်းသုံးရာ ကျောင်းတိုက်မှ ထွက်ခွာပေးရန်
ရန်ကုန်တိုင်းဒေသကြီး သံဃနာယကအဖွဲ့က စက်တင်ဘာလ ၆ ရက်နေ့တွင်
အမိန့်ထုတ်ခဲ့ကြောင်း ရန်ကုန်တိုင်းဒေသကြီး သံဃနာယကအဖွဲ့ ဒုတိယဥက္ကဋ္ဌ
ဆရာတော်က The Voice သို့ မိန့်ကြားသည်။
ဆုံးဖြတ်ချက်သည် နိုင်ငံတော် သံဃမဟာနာယက အဖွဲ့၏ ဆုံးဖြတ်ချက်ဖြစ်ပြီး
ယင်းကျောင်းတိုက် ဆရာတော်က အဆိုပါ စာချသံဃာတော်ကို ကျောင်းတွင်
ဆက်လက်သီတင်းသုံးခွင့် မပြုနိုင်တော့ ကြောင်း တင်ပြလာသည်ကို
စုံစမ်းစစ်ဆေးရေး အဖွဲ့ဖွဲ့ကာ စစ်ဆေးဆုံးဖြတ်ခဲ့ခြင်း ဖြစ်ကြောင်း
တိုင်းသံဃနာယကအဖွဲ့ ဒုတိယဥက္ကဋ္ဌ ဆရာတော်က ထပ်မံမိန့်ကြားသည်။
“နိုင်ငံတော်ရဲ့ ဆုံးဖြတ်ချက်နဲ့ပါ၊ ဘုန်းကြီးတို့ ကြားကနေ
ဆောင်ရွက်ပေးရတာပါ။ ကျောင်းက နိုင်ငံတော် သံဃနာယက အဖွဲ့ပိုင်ကျောင်းဆိုတော့
သံဃနာယက အဖွဲ့ဝင် ၄၇ ပါးရဲ့ ဆုံးဖြတ်ချက်ချတယ်။ နိုင်ငံရေး လုပ်လို့ပါ” ဟု
နိုင်ငံတော် သံဃနာယကအဖွဲ့ ဒုတိယဥက္ကဋ္ဌ ဆရာတော် ဘဒ္ဒန္တဂုဏာလင်္ကာရက
မိန့်ကြားသည်။
အဆိုပါ သံဃာတော်သည် ၂၀၀၈ ခုနှစ်
နာဂစ်မုန်တိုင်းအပြီး ကူညီကယ်ဆယ်ရေး လုပ်ငန်းများ ဆောင်ရွက်ခဲ့ပြီး
ထောင်ခုနစ်နှစ် ချမှတ်ခံခဲ့ရကာ ၂၀၁၂ ခုနှစ် ဇန်နဝါရီလတွင် ပြန်လည်
လွတ်မြောက်လာခဲ့ကြောင်း အဆိုပါ ကျောင်းတိုက်တွင် သံဃာအပါး ၃၀ ကို စာသင်စာချ
ပြုလုပ်နေကြောင်း ကျောင်းမှနှင်ထုတ်ခံရသည့် သံဃာတော် ဦးဃောသိတက ဆိုသည်။
“ဦးပဉ္ဇင်းက အဲဒီကျောင်းမှာ သီတင်းသုံးနေတာ ခုနစ်နှစ်လောက်ရှိပြီ။ အဓိက
ဦးပဉ္ဇင်းကို နှင်ရတာက ကျောင်းထိုင် ဆရာတော်ရဲ့ ကျောင်းမြေရောင်းစားတဲ့
အကြောင်းတွေကို တိုင်လို့ပါ။ အဲဒီလိုသာ မတိုင်ရင် ရာသက်ပန် နေလို့ရပါတယ်”
ဟု ဦးဃောသိတက မိန့်ကြားသည်။
ယခုအချိန်သည် ဝါတွင်းကာလ
ဖြစ်သည့်အတွက် သီတင်းကျွတ်လပြည့်ကျော် ၁ ရက်နေ့ ရောက်မှသာ ကျောင်းတိုက်မှ
ထွက်ခွာရမည် ဖြစ်ကြောင်း အဆိုပါ သံဃာတော်က မိန့်ကြားသည်။
The Voice
No comments:
Post a Comment