ရုရှားနိုင်ငံ၊ ဆိုက်ဘေးရီးယား ဒေသတွင် နေထိုင်သူ တစ်ဦးသည် ကိုယ်တိုင်တူးထားသည့် ဥမင်တစ်ခုမှတစ်ဆင့် ရေနံ တန်ချိန် (၃၀)ခန့်ထိကို ခိုးယူထားနိုင်ခဲ့ကြောင်း သိရှိရသည်။ မီတာ(၆၀)ရှည်လျားသည့် သတ္တုဥမင် တစ်ခုကို (၃)နှစ်ကြာ တူးဖော် ဖော်လုပ်ခဲ့သည့်နောက် ၎င်းသည် ဒေသတွင်း လောင်စာဆီ ပိုက်လိုင်းမှ ဆီများကို ခိုးယူနိုင်ခဲ့ခြင်း ဖြစ်သည်။ သို့သော်လည်း ၎င်း၏ လုပ်ရပ်သည် သက်တမ်းရှည်ရှည် မခံခဲ့ဘဲ ရဲများက ဖမ်းမိသွားခဲ့သည်။ ထိုသူက မိမိသည် (၂၀၁၀)ပြည့်နှစ်မှ (၂၀၁၃)ခုနှစ်ထိ (၃)နှစ်ကြာ အချိန်ယူကာ ယင်းဥမင်ကို ဖောက်လုပ်ခဲ့ကြောင်း ဝန်ခံခဲ့သည်။
၎င်းပိုင်ဆိုင်သည့် ခြံဝင်းအတွင်းမှနေ၍ ပိုက်လိုင်းသို့ ဆက်သွယ်သော ဥမင်ကို အဆိုပါ သံသယ တရားခံက မြေအောက်တွင် သွယ်တန်း ဖောက်လုပ်ခဲ့ခြင်း ဖြစ်သည်။ ယင်းပိုက်လိုင်းကို ရုရှားရေနံလုပ်ငန်းကြီး Transneftက ပိုင်ဆိုင်သည်။ သတင်းများက အမည်ဖော်မပြသော အဆိုပါ သံသယ တရားခံသည် ပိုက်လိုင်းကို အပြီးသတ်ခဲ့ပြီးနောက် (၃)လအတွင်း ရေနံတန်ချိန် (၃၀)မျှကို ခိုးယူနိုင်ခဲ့သည်။ ရာဇဝတ်မှု ထောက်လှမ်းရေး အရာရှိ ယူလီယာ ခါဘီဘူလီနာက "ဒီကိစ္စအတွက် သက်ဆိုင်ရာ ကုမ္ပဏီမှာ ရူဘယ်လ် ငါးသိန်း (ဒေါ်လာ ၁၆၂၀၀ ဝန်းကျင်)လောက် ထိခိုက် နစ်နာခဲ့ပါတယ်"ဟု ပြောကြားခဲ့သည်။
အဆိုပါ ပိုက်လိုင်းသည် ဆိုက်ဘေးရီးယား ဒေသအတွင်း မြို့များဖြစ်သည့် အိုမက်စ်ခ်နှင့် အာကက်စ်ခ်တို့ကို ဆက်သွယ် ဖောက်လုပ်ထားခြင်း ဖြစ်သည်။ သတင်းများက ယင်းတရားခံကို အမည်မဖော်ပြသော်လည်း အသက်(၅၂)နှစ် ရှိပြီဖြစ်ကာ ကုန်စည်သယ်ယူ ပို့ဆောင်ရေး လုပ်ငန်းတစ်ခုတွင် လုပ်ကိုင်နေကြောင်းမူ ရေးသားခဲ့ကြသည်။ ရဲများထံ ထွက်ဆိုရာတွင် ၎င်းက ဥမင်သွယ်တန်းခဲ့ခြင်းနှင့် ပတ်သက်ပြီး "ကျွန်တော့် ရည်မှန်းချက်က ဖြစ်လာတဲ့ စိတ်ကူးအတိုင်း လုပ်နိုင်လား၊ မလုပ်နိုင်ဘူးလား ဆိုတာကို သိချင်ရုံပါပဲ။ လူတစ်ယောက် ရေးထားတဲ့ သုတေသန စာတမ်းကို ဖတ်မိခဲ့ရာက ဒါကို ကျွန်တော် အစပြုမိခဲ့တာ ဖြစ်ပါတယ်"ဟု ရဲများထံ ထွက်ဆိုသွားခဲ့သည်။
planet.com.mm
