12.1.2014
ကချင်ပြည်နယ်နှင့် ရှမ်းပြည်နယ် အတွင်းရှိ KIO/KIA တို့ ဖမ်းဆီးထားသော ရှမ်းတိုင်းရင်းသားများ မျိုးနွယ်စုများကို အမြန်ဆုံး လွှတ်ပေးရန်အတွက် ရှမ်းတိုင်းရင်းသားများ ဒီမိုကရက်တစ် SNDP ပါတီ ညီလာခံမှ တောင်းဆို လိုက်ကြောင်း SNDP ပါတီ အတွင်းရေးမှူး ဦးစိုင်းလှကျော်က ပြောကြားသည်။
ရှမ်းပြည်နယ် မြောက်ပိုင်း မူဆယ်မြို့တွင် ဇန်နဝါရီ ၈ ရက်နှင့် ၉ ရက်နေ့တွင် ပြုလုပ်သော SNDP ပါတီညီလာခံမှ အထက်ပါအတိုင်း ထုတ်ပြန် ကြေညာလိုက်ခြင်း ဖြစ်ကြောင်း ၎င်းကဆိုသည်။
“ကွတ်ခိုင် မြို့နယ်ဘက်က တိုင်စာတွေ SNDP ကို ပို့ထားတာတွေ ရှိနေတယ်။ အဲဒါကို ပါတီညီလာခံမှာ ဆွေးနွေးပြီး ထုတ်ပြန် ကြေညာလိုက်တာပါ” ဟု ၎င်းကဆိုသည်။
ယင်းသို့ SNDP ပါတီညီလာခံ တောင်းဆိုမှုကို KIA မှ တုံ့ပြန့်မှုရှိ မရှိကို စောင့်ကြည့်သွားမည် ဖြစ်ပြီး ဖမ်းဆီးခံ ရှမ်းတိုင်းရင်းသား မျိုးနွယ်စုများနှင့် အခြားတိုင်းရင်းသားများကို ခြွင်းချက်မရှိ လွှတ်ပေးရန် ဆက်လက် ကြိုးပမ်းသွားမည် ဖြစ်ကြောင်း SNDP မှ သိရသည်။
အလားတူ ကချင်ပြည်နယ်အတွင်း နေထိုင်သော ရှမ်းတိုင်းရင်းသား ၁၇ ဦးကို ဖမ်းဆီး ခေါ်ဆောင်ခြင်းနှင့် ပတ်သက်ပြီး KIO/KIA နှင့် ညှိနှိုင်းမရလျှင် ရှမ်းလူမျိုးများ အခွင့်အရေးကို ကာကွယ်ရန် ပြည်နယ်အစိုးရထံသို့ တရားဥပဒေနှင့်အညီ တင်ပြပြီး ပြည်သူ့စစ် ဖွဲ့စည်းမည် ဖြစ်ကြောင်း ရှမ်းမျိုးနွယ်စုရေးရာ အဖွဲ့မှ ဇန်နဝါရီ ၈ ရက်နေ့တွင် ထုတ်ပြန် ကြေညာထားသည်။
ယင်းသို့ လူမျိုးစုများ အခွင့်အရေးနှင့် ပတ်သက်ပြီး နိုင်ငံရေး ဆွေးနွေးပွဲများမှ တစ်ဆင့်ဖြေရှင်းနိုင်မည် ဖြစ်ကြောင်း မြန်မာ ငြိမ်းချမ်းရေးစင်တာ Myanmar Peace Center မှ ဦးညိုအုန်းမြင့်က ပြောကြားထားသည်။
နှစ်ရက်ကြာ ပြုလုပ်ခဲ့သော ရှမ်းတိုင်းရင်းသား ဒီမိုကရက်တစ်ပါတီ ညီလာခံသို့ မြို့နယ်ပေါင်း ၅၉ မြို့နယ်မှ ကိုယ်စားလှယ် ၁၈၀၀ ကျော် တက်ရောက်ခဲ့ပြီး ၂၀၁၅ ရွေးကောက်ပွဲ ဝင်ရောက် ယှဉ်ပြိုင်ရေးနှင့် ပါတီတွင်း လုပ်ငန်းစဉ်များကို ဆုံးဖြတ်ခဲ့ကြောင်း SNDP မှ သိရသည်။
The Voice
Sunday, January 12, 2014
Subscribe to:
Post Comments (Atom)