မတ်(၁၈)
ဗြိတိန်ဝန်ကြီးချုပ်ဟောင်း တိုနီဘလဲအား ပြည်ထောင်စုငြိမ်းချမ်းရေးဖော်ဆောင်ရေးအဖွဲ့၊ ကချင်၊ ကရင် တိုင်းရင်းသားများနှင့်အတူ တွေ့ရစဉ်
ပြည်ထောင်စု ငြိမ်းချမ်းရေး ဖော်ဆောင်ရေးအဖွဲ့နှင့် ကချင်၊ ကရင် တိုင်းရင်းသား လူမှုအဖွဲ့အစည်းများ မတ်လ ၁၆ ရက်နေ့ မွန်းလွဲပိုင်းက ရန်ကုန်မြို့၊ ကမာရွတ်မြို့နယ်ရှိ Myanmar Peace Center တွင် တွေ့ဆုံမှု ပြုလုပ်ခဲ့ရာ မြန်မာနိုင်ငံသို့ ရောက်ရှိနေသည့် ဗြိတိန်ဝန်ကြီးချုပ်ဟောင်း တိုနီဘလဲ ခေတ္တလာရောက်ခဲ့ကြောင်း သိရသည်။
ဗြိတိန်ဝန်ကြီးချုပ်ဟောင်း တိုနီဘလဲသည် ပြည်ထောင်စုဝန်ကြီး ဦးစိုးသိန်းနှင့် သီးခြားတွေ့ဆုံမှု ပြုလုပ်ခဲ့ခြင်းဖြစ်ပြီး ယင်းသို့တွေ့ဆုံမှုမှတစ်ဆင့် ပြည်ထောင်စု ငြိမ်းချမ်းရေးအဖွဲ့နှင့် ကချင်၊ ကရင် တိုင်းရင်းသား လူမှုအဖွဲ့အစည်း တွေ့ဆုံပွဲသို့ လာရောက်ခဲ့ခြင်း ဖြစ်ကြောင်း Myanmar Peace Center မှ တာဝန်ရှိသူ တစ်ဦးက ပြောကြားခဲ့သည်။
အဆိုပါ ဆွေးနွေးပွဲကို ပြည်ထောင်စု ငြိမ်းချမ်းရေး ဖော်ဆောင်ရေး အဖွဲ့က တိုင်းရင်းသား လူမှုအဖွဲ့အစည်းများနှင့် တွေ့ဆုံပြီး ငြိမ်းချမ်းရေး လုပ်ငန်းစဉ်တွင် အဖွဲ့၏ လုပ်ဆောင်ချက်များ ရှင်းလင်းခြင်းနှင့် တိုင်းရင်းသား လူမှုအဖွဲ့အစည်းများနှင့် ဆွေးနွေးခြင်းတို့ ပြုလုပ်ရန် ပြည်ထောင်စုဝန်ကြီး ဦးအောင်မင်း ဦးဆောင်ပြုလုပ်ခဲ့ကြောင်း သိရသည်။
ယင်းတို့ တွေ့ဆုံဆွေးနွေးမှု ပြုလုပ်ရာတွင် ယခုကဲ့သို့ ပြည်ထောင်စု ငြိမ်းချမ်းရေး ဖော်ဆောင်ရေးအဖွဲ့နှင့် ကရင်တိုင်းရင်းသား လူမှုအဖွဲ့အစည်းများ တွေ့ဆုံမှုမှာ သုံးကြိမ်ရှိပြီ ဖြစ်သော်လည်း ကချင်တိုင်းရင်းသား လူမှုအဖွဲ့အစည်းများနှင့် တွေ့ဆုံမှုမှာမှု ပထမဆုံးအကြိမ် ဖြစ်ကြောင်း သိရသည်။
အဆိုပါ တွေ့ဆုံမှုသို့ လာရောက်ခဲ့သည့် ဗြိတိန်ဝန်ကြီးချုပ်ဟောင်း တိုနီဘလဲနှင့် ပတ်သတ်၍ ကချင်ငြိမ်းချမ်းရေး ကွန်ရက်က ညှိနှိုင်းရေးမှူး ဖြစ်သူက “တိုနီဘလဲက ဘာမှမဆွေးနွေးပါဘူး။ လာမယ်လို့ ကြိုပြောထားတာ လုံးဝမရှိပါဘူး။ ကျွန်တော်တို့ကို ခေါ်တာက ဦးအောင်မင်းနဲ့ တွေ့ဖို့ခေါ်တာ။ အဲဒီလို တွေ့နေချိန်မှာ ငါးမိနစ်လောက် စကားလာပြောသွားတာ။ ကျွန်တော်တို့ကို တွေ့ဆုံပြီး လူမှုအဖွဲ့အစည်းနဲ့ လူထုနဲ့ တွေ့ဆုံဆွေးနွေးခြင်း အသွင်နဲ့ လုပ်လိုက်တယ်လို့ ခံယူတယ်။ ကျွန်တော်တို့ ဦးအောင်မင်းနဲ့ ဆွေးနွေးမှု မလုပ်ခင်မှာလည်း အခုလိုတွေ့ဆုံတာ ကချင်လူထုနဲ့ တွေ့ဆုံဆွေးနွေးတယ်လို့ မခံယူစေချင်ဘူးလို့ ပြောပြခဲ့ပါတယ်” ဟု ပြောပြခဲ့သည်။
တိုနီဘလဲ ပြောတဲ့အထဲမှာ ကျွန်တော်နားလည်လိုက်တာက အတိတ်အဖြစ်အပျက်တွေကို မေ့နိုင်တဲ့သတ္တိစိတ်ဓာတ် ရှိစေချင်တယ်။ ဒီလိုမျိုးငြိမ်းချမ်းရေး လုပ်ငန်းစဉ်တွေ ဆိုတာ စိတ်ရှည်သည်းခံရတယ်။ နောက်ဆုံးပြောတာက ဒီလုပ်ငန်းက မလွယ်ပါဘူး တကယ်လို့များ ကူညီနိုင်တာလေးတွေ ရှိရင်ပြောပါ။ ကျွန်တော်တို့ အနေနဲ့ ခင်ဗျားတို့နဲ့ အတူတူပါပဲ ဆိုတာမျိုးပါတယ်” ဟု အဆိုပါပုဂ္ဂိုလ်က ဆက်လက်ပြောကြားခဲ့သည်။
Myanmar Peace Center မှ တာဝန်ရှိသူ တစ်ဦးက “ကရင်လူမှု အဖွဲ့အစည်းတွေကို ဖိတ်ကြားပေးဖို့ KPP ပါတီက ဦးစောထွန်းအောင်မြင့်ကို မေတ္တာရပ်ခံတယ်။ တပြိုင်နက်တည်းမှာ ကချင်လူမှု အဖွဲ့အစည်းတွေကို ဖိတ်ကြားဖို့ ငြိမ်းဖောင်ဒေးရှင်းက ဒေါ်ဂျာနန်းကို ကျွန်တော်တို့ MPC က မေတ္တာရပ်ခံခဲ့ပါတယ်။ ကရင်က အဖွဲ့အစည်းတွေကို ဖိတ်ကြားပြီးတဲ့ အချိန်မှာ ကချင်အဖွဲ့အစည်းတွေက တနင်္ဂနွေနေ့မှာ တက်နိုင်ဖို့ အခက်အခဲရှိတယ်။ စနေနေ့ကို ပြောင်းပေးပါ ဆိုတဲ့အတွက် စနေနေ့နေ့လည်မှာ လက်ကျန် နိုင်/ကျဉ်း စိစစ်ရေးကော်မတီ အစည်းအဝေး ရှိနေတော့ ညနေသုံးနာရီမှာ ချိန်းပေးတယ်။ အယူအဆ ဆိုတာကတော့ ဘယ်ဘက်က ကြည့်လဲဆိုတာမျိုးတော့ ရှိမှာပါ”ဟု ပြောပြခဲ့သည်။
“အစည်းအဝေးက ၃ နာရီစတယ်။ ငါးနာရီခွဲမှာ ပြီးမှာဖြစ်ပေမယ့် အဲဒီအချိန်မှာ ၀န်ကြီးဦးစိုးသိန်းနဲ့ အခြားနေရာမှာ တွေ့တဲ့ ဗြိတိန်ဝန်ကြီးချုပ်ဟောင်းကို ၀န်ကြီးဦးစိုးသိန်းက ဒီမှာဆွေးနွေးပွဲ လုပ်ပါတယ်လို့ ပြောတဲ့အခါ သူက စိတ်ဝင်စားလို့ သူရောလာကြည့်လို့ မရဘူးလားပြောတယ်။ ကျွန်တော်တို့ကလည်း တိုနီဘလဲက ခဏတွေ့ချင်တယ်ဆိုတာ အားလုံးကို ခွင့်တောင်းပါတယ်လို့ ပြောပါတယ်။ တိုနီဘလဲကလည်း ဒီလိုမျိုးဟာက အခက်အခဲရှိပါတယ်တဲ့။ ငြိမ်းချမ်းရေး ဆွေးနွေးတယ်ဆိုတာ ခက်ပါတယ်တဲ့။ ဒါကယုံကြည်မှု တည်ဆောက်ပြီး လုပ်ရတဲ့ အလုပ်ဖြစ်တယ်။ သူ့အနေနဲ့ ဒီလိုမျိုးဆောင်ရွက်နေတာ ထောက်ခံတယ်။ ဆက်ပြီးကြိုးစားကြပေါ့ဆိုပြီး ပြောသွားပါတယ်” ဟု အဆိုပါ တာဝန်ရှိသူက ဆက်လက်ပြောကြားသည်။
အဆိုပါ တွေ့ဆုံဆွေးနွေးပွဲသို့ ကရင်လူမှု အဖွဲ့အစည်းများမှ အဖွဲ့ဝင် ၅၀ ဦး ၀န်းကျင်တက်ရောက်ခဲ့ပြီး ကချင်လူမှု အဖွဲ့အစည်းများမှ အဖွဲ့ဝင် ၁၀ ဦးဝန်းကျင် တက်ရောက်ခဲ့ကြောင်း သိရသည်။
eleven
