တာချီလိတ်ခရိုင်က ပြည်သူ့စစ်ခေါင်းဆောင်အိမ်၌ ဗုံးကွဲ တဦးသေ

သြဂုတ်လ(၁၆)ရက်


တာချီလိတ်ခရိုင် တာလေမြို့နယ်ခွဲ အခြေစိုက် ပြည်သူ့စစ်ခေါင်းဆောင်တဦး၏ နေအိမ်တွင် ဗုံးတလုံး ကွဲကာ လူတဦးသေဆုံးပြီး သုံးဦးဒဏ်ရာရရှိသည်ဟု ဒေသခံများကပြောသည်။


“အိမ်က သူ့တပည့် အိမ်ဒေါင့်မှာ ရှိတဲ့ ဗုံးအဟောင်းယူဆော့လို့ ကွဲသွားတာတဲ့။ အဲဒီဆော့တဲ့ ကောင်လေးက ဗမာ လူမျိုး။ သူ့ဆီမှာ အလုပ်လာလုပ်တာတောင်မကြာသေးဘူး၊ အသက် ၂၂ နှစ်ဘဲရှိသေးတယ် ပွဲချင်းပြီး 

 သေတယ်။ နောက်သုံးယောက် ဒဏ်ရာရတယ်ပြောတယ်” - ဟု တာလေမြို့ခံ စိုင်းလာဆိုင် က ပြောသည်။


၂၀၁၃ ဩဂတ်စ် ၁၂ ရက် နေ့ခင်းပိုင်းတွင် တာလေမြို့နယ်ခွဲ မြို့လမ်းမ ပေါ်ရှိ ဦးခင်မောင်လတ် (လားဟူ အမျိုးသား) တာလေ မြို့ပြည်သူ့စစ်ခေါင်းဆောင်၏ နေအိမ်၊ ခမလ သတ္တုတူးဖေါ်ရေး ကုမ္ပဏီ တွဲလျက်ဖွင့် ထား သော ရုံးခန်းတွင် ဗုံးတလုံးပေါက်ကွဲခဲ့သည်ဟုဆိုသည်။


“ဦးခင်မောင်လတ် ခေါ် စိုင်းအင်းဆိုင် က နမ့်လင်းချောင်းတလျှောက်ထွက်ရွှေတွေကို တူးဖေါ် တဲ့ ကုမ္ပဏီ အိမ်နဲ့တွဲလျက်ဖွင့်ထားတယ်။ သူ့သားကြီးက တာလေမြို့နယ်ခွဲ ဥက္ကဌ ဦးသန့်ခင်လတ်တဲ့။ လူနာတွေတော့ အရှေ့ဘက်ကမ်းသွားကုနေတယ်လို့ပြောတယ်” - ဟု ရပ်သားတဦးက ပြောပါသည်။


အဆိုပါ ဗုံးပေါက်ကွဲမှုမှာ မတော်တဆမှု မဖြစ်နိုင်ကြောင်း ဝေဖန်သံများလည်း ရှိနေပါသည်။ သီးခြားအတည်ပြုချက်တော့မရသေးပေ။


တာလေမြို့နယ်ခွဲသည် ၂၀၁၁ က အင်အားပြင်းငလျင်ဒဏ် ခံခဲ့ရသည့်မြို့ဖြစ်သည်။ ထိုစဉ် ဦးခင်မောင်လတ်အိမ်လည်း ပျက်စီးမှု တော်တော်များများရှိခဲ့သည်။


တာလေပြည်သူ့စစ်ခေါင်းဆောင် ဦးခင်မောင်လတ်သည် အစိုးရ၊ စစ်အရာရှိကြီးများ ဝင်ဆန့်နိုင်သူဖြစ်၏။ နမ့်လင်းချောင်း ရွှေလုပ်ငန်းတူးဖေါ်ရေးလုပ်ငန်း ကုမ္ပဏီများအနက် ၎င်းကုမ္ပဏီလည်းတခုပါဝင်သည်။

သျှမ်းသံတော်ဆင့်