မေလ ၂၉ ရက်
မူဆယ် ၁၀၅ မိုင် ကုန်သွယ်ရေးဇုန်ရှိ ကုန်စည်သယ်ဆောင်သည့် ကားများအားတွေ့ရစဉ်
တရုတ်ဆန် အချို့တွင် ကင်ဆာဖြစ်စေနိုင်သည့် စက်မှုလုပ်ငန်းသုံး ဓာတုပစ္စည်းတစ်မျိုး ပါဝင်နေကြောင်း၊ ထို့အတွက် စားသုံးရန် မသင့်ကြောင်းနှင့် ဆန်စက်လုပ်ငန်းများ ရပ်ဆိုင်းခြင်း၊ ဆန်များကို ပြန်လည်သိမ်းဆည်းခြင်း ပြုလုပ်လျက်ရှိကြောင်း သတင်းရရှိသည်။
တရုတ်နိုင်ငံ၊ ဂွမ်ဒေါင်းပြည်နယ်၊ ကွမ်ကျိုးမြို့၌ စားသုံးလျက်ရှိသော ဆန်နှင့်ဆက်စပ် စားသောက်ကုန် အချို့တွင် ကင်ဆာဖြစ်စေနိုင်သည့် စက်မှုလုပ်ငန်းသုံး ဓာတုပစ္စည်း တစ်မျိုးဖြစ်သော Cadmium ဓာတ် ပါဝင်နေသည်ကို စစ်ဆေးတွေ့ရှိခဲ့ကြောင်း သိရသည်။
စားသောက်ဆိုင်နှစ်ခုမှ စားသောက်ဖွယ်ရာများကို စတင်စစ်ဆေးရာမှ နောက်ဆုံးတွင် ဆန်တွင် အဆိုပါဓာတ် ပါဝင်နေခြင်းဖြစ်ကြောင်း ကွမ်ကျိုးမြို့ အစားအသောက်နှင့် ဆေးဝါးစီမံ ခန့်ခွဲရေးဌာနမှ စစ်ဆေးတွေ့ရှိကာ ထုတ်ပြန်ခဲ့ခြင်း ဖြစ်သည်။
ကွမ်ကျိုးမြို့ ဆန်နှင့် ဆက်စပ်ထွက်ကုန်များ၏ ၄၄ ဒသမ ၄ ရာခိုင်နှုန်းတွင် အဆိုပါဓာတ် ပါဝင်နေကြောင်း ထုတ်ပြန်ခဲ့ခြင်း ဖြစ်သည်။ ၎င်းအပြင် တရုတ်နိုင်ငံ၊ ယူနန်ပြည်နယ် ကျူကျိုးမြို့ရှိ ဆန်စက်သုံးခုမှ ကြိတ်ခွဲရောင်းချသည့် ဆန်များတွင်လည်း အဆိုပါဓာတ် ပါဝင်နေကြောင်း စစ်ဆေးတွေ့ရှိရ၍ ဆန်စက်သုံးလုံးအား ရပ်ဆိုင်းထားရန်နှင့် ဈေးကွက်အတွင်း ဖြန့်ဖြူးထားသော ဆန်များကို ပြန်သိမ်းရန် အမိန့်ထုတ်ပြန်ခဲ့ကြောင်း သိရသည်။
အထွေထွေရောဂါကု ဆရာဝန်တစ်ဦးက "Cadmium ကို CD လို့ ခေါ်တယ်။ အဲဒီဓာတ်က ဇင့်၊ ပြဒါးဓာတ်တွေနဲ့ တူတယ်။ သတ္တုတူးဖော်ရေး လုပ်ငန်းတွေရဲ့ အောက်ဘက်မှာရှိတဲ့ မြစ်ကမ်းတစ်လျှောက်က သီးနှံနဲ့ ရေတွေမှာ ပါဝင်နေတတ်တယ်။ ကင်ဆာမျိုးစုံ၊ နှလုံးနဲ့ ကျောက်ကပ်ကို အဓိက ထိခိုက်တယ်။ အရင်တုန်းက ဂျပန်မှာ အဖြစ်များခဲ့ဖူးတယ်။ သတိထားသင့်တယ်" ဟု ပြောပြသည်။
အဆိုပါ ဆန်များအား တရုတ်နိုင်ငံရှိ စစ်ဆေးတွေ့ရှိရာ ဒေသများတွင် သိမ်းဆည်းဖျက်ဆီး ခဲ့သည်ဆိုပါက အကြောင်းမဟုတ်သော်လည်း ပတ်ဝန်းကျင် နိုင်ငံများသို့ ဈေးပေါပေါဖြင့် တရားမ၀င် လမ်းကြောင်းမှတစ်ဆင့် ရောင်းချခြင်း၊ ဆန်အနေဖြင့် မဟုတ်ဘဲ စားသောက်ကုန်အဖြစ် Value Added အဆင့် ပြုလုပ်ရောင်းချခြင်းများ ပြုလုပ်လာပါက စိုးရိမ်စရာဖြစ်၍ သတိပြုသင့်ကြောင်း စားသုံးသူများက ပြောကြားသည်။
ထို့ကြောင့် မြန်မာနိုင်ငံ နယ်စပ်တစ်လျှောက်တွင် တရားမ၀င် ဆန်မှောင်ခိုမှုများအား ထိရောက်စွာ စစ်ဆေးရန်လိုကြောင်း တရုတ်နိုင်ငံဖြင့် ကုန်သွယ်မှု ပြုလုပ်နေသည့် လုပ်ငန်းရှင်တစ်ဦးက "ဖျက်ပစ်ရင် အကြောင်းမဟုတ်ဘူး။ ဆန်အနေနဲ့ပဲဖြစ်ဖြစ် စားသောက်ကုန် လုပ်ပြီးပို့ရင်ပဲဖြစ်ဖြစ် ၀င်လာနိုင်တယ်။ ၀င်လာမယ်လို့ပြောတာ မဟုတ်ဘူး။ ၀င်လာနိုင်တယ်။ နယ်စပ်ကနေပဲ တရားမ၀င် ၀င်လာနိုင်တယ်။ ဥပမာ-မြန်မာက ဆန်ကိုဝယ်မယ် အပြန်မှာ အဲဒီဆန်တွေကို အပေါဆုံးဈေးနဲ့ ပြန်ထည့်ပေးလိုက်နိုင်တယ်။ မြန်မာနိုင်ငံကိုလည်း ၀င်လာနိုင်သလို အခြားနီးစပ်တဲ့ နိုင်ငံတွေကိုလည်း ရောက်သွားနိုင်လို့ စိစစ်ဖို့လိုတယ်လို့ ပြောတာပါ" ဟု ပြောပြသည်။
EMG
