မလေးရှားနိုင်ငံရှိ ထိန်းသိမ်းရေး စခန်းများတွင် လူဝင်မှု ကြီးကြပ်ရေး ဥပဒေများဖြင့် ရောက်ရှိနေသူ မြန်မာနိုင်ငံသား ၃၀၀၀ ကျော်အနက် ပြစ်ဒဏ် သက်တမ်း စေ့ပြီး မြန်မာနိုင်ငံသို့ ပြန်လိုသူ ၁၇၅ ဦးကို စင်းလုံးငှား လေယာဉ်ဖြင့် မြန်မာနိုင်ငံသို့ ပြန်လည်ပို့ဆောင်ရန် စီစဉ်နေကြောင်း မလေးရှား နိုင်ငံသို့ ရောက်ရှိနေသော The Daily Eleven သတင်းထောက်က သတင်းပေးပို့ပါသည်။
ဧရာဝတီ ဖောင်ဒေးရှင်းနှင့် မလေးရှား နိုင်ငံရှိ မြန်မာသံရုံးတို့၏ ပူးပေါင်းဆောင်ရွက်မှုဖြင့် ထိန်းသိမ်းရေး စခန်းများတွင် ရောက်ရှိနေပြီး မြန်မာနိုင်ငံသို့ ပြန်ရန် လေယာဉ်လက်မှတ် အခက်အခဲ ရှိနေသူများ၊ မိသားစုဝင်များနှင့် အဆက်အသွယ် မရရှိသူများအနက် မြန်မာနိုင်ငံသို့ ပြန်လိုသူများကို ကနဦး အစီအစဉ် အနေဖြင့် လေယာဉ်စင်းလုံးငှားပြီး ပို့ဆောင်ရန် စီစဉ်နေခြင်းဖြစ်သည်။
''နောက်တစ်ပတ် စနေနေ့ (ဇွန် ၂၉ရက်)မှာ ပြန်ပို့နိုင်ဖို့ စီစဉ်နေပါတယ်'' ဟု မလေးရှားနိုင်ငံသို့ ရောက်ရှိနေသော ဧရာဝတီ ဖောင်ဒေးရှင်း အမှုဆောင်အဖွဲ့ကို ဦးဆောင်သူ ကိုရဲမျိုးဟိန်းက ပြောကြားသည်။
မလေးရှား လူဝင်မှု ကြီးကြပ်ရေးဌာန၏ လုပ်ထုံးလုပ်နည်းအရ ထိန်းသိမ်းရေး စခန်းများမှ ပြန်လိုသူများကို စနေနေ့တွင်သာ ပြန်လည်ပို့ဆောင်ခြင်း ဖြစ်ပါသည်။ ထိုသို့ ပို့ဆောင်ရာတွင် ထိန်းသိမ်းရေး စခန်းများမှ လေဆိပ်သို့ ပို့ဆောင်ခြင်းကို မလေးရှား လူဝင်မှု ကြီးကြပ်ရေးဌာနက တာဝန်ယူပြီး လေယာဉ်ပေါ်သို့ တိုက်ရိုက်ပို့ဆောင်သည့် အချိန်အထိ လက်ထိပ်ခတ် ခေါ်ဆောင်မည် ဖြစ်သည်။
ထိန်းသိမ်းရေး စခန်းသို့ ရောက်ရှိနေသူများသည် မလေးရှား နိုင်ငံသို့ တရားမ၀င် ၀င်ရောက်ပြီး နယ်စပ်၌ပင် အဖမ်းခံခဲ့ရသူများ၊ အော်ပရာစီဖြင့် အဖမ်းခံခဲ့ရ သူများဖြစ်ကာ မလေးရှား လူဝင်မှုကြီးကြပ်ရေး ဥပဒေများအရ ထောင်ဒဏ် အသီးသီး ကျခံခဲ့ပြီးသူများ ဖြစ်ကြသည်။
ထိန်းသိမ်းရေး စခန်းတွင် ရောက်ရှိနေသူများအနက် အများစုမှာ မြန်မာနိုင်ငံသို့ မပြန်လိုဘဲ ကုလသမဂ္ဂ အသိအမှတ်ပြု ဒုက္ခသည် ကတ်ပြားရရှိရန် စောင့်ဆိုင်းလျက် ရှိနေပါသည်။ ထိုသို့ ရရှိရန်မှာ ခက်ခဲသော်လည်း ထိုကတ်ပြား ရရှိပါက မလေးရှားနိုင်ငံအတွင်း တရားဝင် နေထိုင်ခွင့် ရရှိသည့်နည်းတူ တတိယနိုင်ငံများသို့လည်း သွားရောက်ခွင့် ရမည်ဖြစ်သောကြောင့် စောင့်ဆိုင်းနေခြင်း ဖြစ်ကြောင်း သိရသည်။
ယခုပြန်လည် ပို့ဆောင်ပေးမည့် သူများကို ဧရာဝတီ ဖောင်ဒေးရှင်းက အခမဲ့အနေဖြင့် ကူညီခဲ့ခြင်း ဖြစ်သည်။
Eleven Media Group
