လာမည့် စက်တင်ဘာလအတွင်း မန္တလေးမြို့တွင် ကျင်းပမည် ဖြစ်သည့် အာဆီယံ အမျိုးသမီး ချန်ပီယံရှစ်တွင် မြန်မာ လက်ရွေးစင် အမျိုးသမီး အသင်းသည် ဧည့်သည် အသင်းတစ်သင်း ဖြစ်သည့် ဂျပန်အမျိုးသမီး ယူ-၂၃ အသင်းနှင့် အုပ်စု(ခ)တွင် တစ်အုပ်စုတည်း ကျရောက်နေကြောင်း သိရသည်။
2013 Asean Women's Championship ကို စက်တင်ဘာလ (၉)ရက်မှ (၂၂)ရက်ထိ မန္တလေး မြို့တွင် ကျင်းပမည် ဖြစ်သည်။ ယခုနှစ်တွင် အဆိုပါ ပြိုင်ပွဲသို့ ဧည့်သည် အသင်းများ ၀င်ရောက် ယှဉ်ပြိုင်မည် ဖြစ်ပြီး ဂျပန်၊ သြစတြေးလျနှင့် ဂျော်ဒန်နိုင်ငံများမှ ၀င်ရောက် ယှဉ်ပြိုင်မည် ဖြစ်သည်။ ဧည့်သည့် နိုင်ငံများအနက် ဂျော်ဒန်နိုင်ငံ တစ်နိုင်ငံတည်းသာ လက်ရွေးစင် အသင်းကို စေလွှတ်ယှဉ်ပြိုင်မည် ဖြစ်ပြီး ဂျပန်နိုင်ငံက ယူ-၂၃ အသင်း၊ သြစတြေးလျ နိုင်ငံက ယူ-၁၉ အသင်းများကိုသာ စေလွှတ်မည် ဖြစ်သည်။ အုပ်စုခွဲဝေမှုများ အရ မြန်မာအသင်းသည် အုပ်စု(ခ)တွင် လာအို၊ ဖိလစ်ပိုင်၊ အင်ဒိုနီးရှား၊ ဂျပန် ယူ-၂၃ အသင်းများနှင့် အတူကျရောက် နေပြီး အုပ်စု(က)တွင် သြစတြေးလျ ယူ-၁၉၊ ထိုင်း၊ လက်ရှိ ချန်ပီယံ ဗီယက်နမ်၊ မလေးရှားနှင့် ဂျော်ဒန် အသင်းများ ပါဝင်နေကြောင်း သိရသည်။ ယခုတစ်ကြိမ်တွင် ဧည့်သည်အသင်း (၃)သင်း ပါဝင်ခဲ့သောကြောင့် သမိုင်းတစ်လျှောက် ဧည့်သည်အသင်း အများဆုံး ၀င်ရောက်ယှဉ်ပြိုင်သည့် ပြိုင်ပွဲအဖြစ် မှတ်တမ်းဝင်ခဲ့သော်လည်း အာဆီယံ ဒေသတွင်း အသင်းများ ဖြစ်သည့် ဘရူနိုင်၊ ကမ္ဘောဒီးယား၊ အရှေ့တီမော၊ စင်ကာပူ အစရှိသည့် အသင်းများမှာ ပါဝင်ယှဉ်ပြိုင်ခြင်း မရှိခဲ့ပေ။
မြန်မာ့လက်ရွေးစင် အမျိုးသမီး အသင်းသည် အာဆီယံ ချန်ပီယံရှစ် ပြိုင်ပွဲတွင် (၂)ကြိမ်တိုင် ဗိုလ်စွဲထားခဲ့သောကြောင့် သြစတြေးလျ၊ ဗီယက်နမ်တို့နှင့် အတူ အအောင်မြင်ဆုံး အသင်းများ စာရင်းတွင် ပါဝင်လျှက် ရှိရာ ယခုနှစ်တွင်သာ ဗိုလ်စွဲနိုင်မည် ဆိုပါက အအောင်မြင်ဆုံး အသင်းအဖြစ် လွတ်လွတ်ကျွတ်ကျွတ် ရပ်တည် နိုင်မည် ဖြစ်သည်။ မြန်မာ့ လက်ရွေးစင် အမျိုးသမီး အသင်းသည် လက်ရှိတွင် အဆိုပါ ပြိုင်ပွဲအတွက် ပြင်ဆင်မှုအဖြစ် ဂျပန်နိုင်ငံ၌ လေ့ကျင့်လျှက် ရှိနေပြီး နောက်ဆုံး ကစားခဲ့သည့် ခြေစမ်းပွဲတွင် ဆီရီဇို အိုဆာကာ လူငယ်အသင်းကို ဂိုးပြတ်နိုင်ပွဲ ရရှိခဲ့ကြောင်း သိရသည်။ မြန်မာ့ လက်ရွေးစင် အမျိုးသမီး အသင်းသည် လက်ရှိတွင် ကမ္ဘာ့အဆင့် သတ်မှတ်ချက်တွင် အဆင့်(၄၃)၌ ရပ်တည်လျှက် ရှိသည်။
အုပ်စု(က) ထိုင်း၊ ဗီယက်နမ်၊ သြစတြေးလျ ယူ-၁၉၊ မလေးရှား ၊ဂျော်ဒန်
အုပ်စု(ခ) မြန်မာ၊အင်ဒိုနီးရှား၊ လာအို၊ ဂျပန် ယူ-၂၃၊ ဖိလစ်ပိုင်
soccermyanmar
