Tuesday, September 24, 2013

တရုတ်-ထိုင်း-မြန်မာ ကုန်သွယ်ရေးလမ်းကြောင်းဖွင့်လှစ်ရေး မြန်မာအဆင်သင့်မဖြစ်သေး

0 comments


၂၄ စက်တင်ဘာလ ၂၀၁၃

သျှမ်းပြည်အရှေ့ပိုင်း ကျိုင်းတုံမြို့တွင် ပြုလုပ်ကျင်းပသော ထိုင်း-မြန်မာ ချစ်ကြည်ရေး ကုန်စည်ပြပွဲမှ ကုန်သွယ်ရေး လမ်းကြောင်းဖွင့်ရေး အတွက်ဆွေးနွေးရာတွင် မြန်မာဘက်မှ သဘောတူညီမှု မရှိသေး ကြောင်း ကျိုင်းတုံဒေသ ခံများကပြောသည်။ 


“ ကုန်စည်ပြပွဲနဲ့အတူ နှစ်ဘက်နိုင်ငံက အကြီးအကဲတွေ ဆွေးနွေးပါတယ်။ ချင်းမိုင်- ကျိုင်းတုံ-ဆစ်ဆောင် ပန်းနား(ကျိုင်းဟုန့် / တရုတ်နိုင်ငံ ယူနန်ပြည်နယ်) အထိ ကုန်သွယ်ရေး လမ်းဖွင့် ဖို့ပေါ့။ ဒေသခံတချို့က ကောင်းတယ်လို့ ပြောပြတယ်။ ဒေသတွင်းလူထု အလုပ် အကိုင်ပေါ မှာလေ။ မြန်မာ အာဏာပိုင်ဘက်ကတော့ သဘောမတူသေးဘူးလို့ကြားသိရပါတယ်။ ဒါကြောင့် လက်မှတ် မထိုးရသေး ပါဘူး” ဟု ပွဲသို့သွားရောက်လေ့လာခဲ့သည့် ကျိုင်းတုံမြို့သား စိုင်းလူတစ် က ပြောဆိုပါသည်။ 


မြန်မာဘက်မှလမ်းပန်းဆက်သွယ်ရေးမကောင်းသေးဟုဆိုကာ နေပြည်တော်အဆင့်ထပ်မံ ဆွေးနွေးလက်မှတ်ရေးထိုးကြရန် သဘောတူခဲ့ကြကြောင်း စစ်တိုင်းမှူးနှင့်နီးစပ်သည့် အသက် ၅၀ အရွယ် ကျိုင်းတုံသား စိုင်းနန်ယီ့က သျှမ်းသံတော်ဆင့်အားပြောပြပါသည်။ 


“ ပွဲစ တဲ့ ၂၁ ရက် မှာချင်းမိုင်က ခရိုင်ဝန်ကိုယ်တိုင်တက်ရောက်တယ်။ ကျနော်တို့ဘက်က စစ်တိုင်းမှူး နဲ့အဖွဲ့ပေါ့။ သိပ်မစည်ဘူးဘဲ။ လူသိ သိပ်မများလို့ထင်တယ်” ဟု အဆိုပါအမျိုးသားကပြောသည်။


ကုန်စည်ပြပွဲ ဖွင့်ပွဲကို ထိုင်းနိုင်ငံချင်းမိုင်မြို့တွင် စက်တင်ဘာ ၁၇ ရက်နေ့ကတည်းက အထွေထွေ အုပ်ချုပ်ရေးရုံးတွင် ပြုလုပ်ခဲ့ပြီးဖြစ်ကြောင်း၊ ကျိုင်းတုံမြို့တွင် စက်တင်ဘာ ၂၁ မှ ၂၃ ရက်အထိ ကုန်စည်ပြပွဲ ပြုလုပ်ခဲ့ကြောင်း သိရသည်။ 


“ကျိုင်းတုံမှာက မြို့တော်ခန်းမ မှာလုပ်တာပါ။ ထိုင်းဘက်က ချင်းမိုင်မြို့ရဲ့ ရိုးရာအထည်တွေ လာ ရောင်းတယ်။ ငွေထည် ယွန်းထည်တွေအပြင် အဝတ်အထည် ပိုးထည်တွေပေါ့ ။ ဈေးကြီးတော့ သိပ်မဝယ်ကြဘူး ။ အလှကုန် ၂ မျိုး ၃ မျိုးလဲပါတယ်။ နေ့ခင်းပိုင်းမှာ လာလည်တဲ့လူ နည်းတယ် ညဘက်မှာဘဲ လာလည်ကြတယ်” ကုန်စည်ပြပွဲသို့သွားရောက်ကြည့်ရှုခဲ့သူ စိုင်းခမ်းက ပြောပါသည်။ 


နှစ်နိုင်ငံချစ်ကြည်ရေး ကုန်စည်ပြပွဲတွင် သျှမ်းပြည်အရှေ့ပိုင်း ကျိုင်းတုံနှင့် ထိုင်းနိုင်ငံ မြောက်ပိုင်း မြို့တော် ချင်းမိုင် မြို့တို့ ရှေး စော်ဘွားခေတ်ကတည်းက အဆက်အသွယ်ရှိခဲ့ပုံ၊ ကူးလူးဆက်ဆံပုံ သမိုင်း အကျဉ်းကိုပါ ရေးသားပြသထားကြောင်းလည်း သိရပါသည်။


သျှမ်းသံတော်ဆင့်

Leave a Reply

 
Shan News © 2011 DheTemplate.com & Main Blogger. Supported by Makeityourring Diamond Engagement Rings

You can add link or short description here