(ဝီလျံဟိတ်ဂ်နှင့် အန်ဂျလီနာဂျိုလီ)
နိုင်ငံခြားရေးဝန်ကြီး ဝီလျံဟိတ်ဂ်နှင့် ကုလသမဂ္ဂ ဒုက္ခသည်များဆိုင်ရာ မဟာမင်းကြီးများရုံး အထူးကိုယ်စားလှယ် အန်ဂျလီနာဂျိုလီ ပူးတွဲရေးသားခြင်း ဖြစ်ပြီး The Voice သို့ သီးခြားပေးပို့ခြင်း ဖြစ်ပါသည်။
(အယ်ဒီတာ)
ဆီးရီးယားနိုင်ငံမှ ဆိုးရွားလှသော ရာဇဝတ်မှုများနှင့် စပ်လျဉ်းသည့်နေ့စဉ် ဖြစ်ရပ်များကား ပြင်ပကမ္ဘာဆီသို့ ရောက်ရှိ နေပါသည်။ အိမ်များကို ရှာဖွေရာနှင့် စစ်ဆေး မေးမြန်းရာတွင် လည်းကောင်း၊ စစ်ဆေးရေးဂိတ်များတွင် လည်းကောင်း၊ နိုင်ငံ တစ်လွှားမှ ထိန်းသိမ်းရေး စခန်းများနှင့် အကျဉ်းထောင်များတွင် လည်းကောင်း အမျိုးသမီး၊ အမျိုးသားနှင့် ကလေး သူငယ်များကို အကြမ်းဖက် ခြိမ်းခြောက်ပြီး အပြစ်ပေးလျက် ရှိသည်ဟု ယခုအခါတွင် ကုလသမဂ္ဂက အတည်ပြုလိုက်ပြီ ဖြစ်ပါသည်။
ကုလသမဂ္ဂ စုံစမ်းရေး ကော်မရှင်၏ နောက်ဆုံး ထုတ်ပြန်လိုက်သော စိတ်မသက်သာဖွယ် အစီရင်ခံစာတွင် ကလေးများကို သတ်ပစ်မည်ဟု ခြိမ်းခြောက်ပြီး ဖမ်းဆီး ချုပ်နှောင်ထားသူများ၏ အဓမ္မလည်း ပြုကျင့်ခံရကာ ထိုသူများအတွက် ချက်ပြုတ်၊ လျှော်ဖွပ်၊ သန့်ရှင်းပေးနေရသူ မိခင်တစ်ဦး အကြောင်းကို ဖော်ပြထားပါသည်။ အစီရင်ခံစာပါ နောက်ထပ်ဖြစ်ရပ် တစ်ခုတွင်ကား သူ့အစ်ကိုမှာ အစိုးရက အလိုရှိသူ ဖြစ်နေသဖြင့် ညီမဖြစ်သူ တက္ကသိုလ် ကျောင်းသူတစ်ဦး အဓမ္မကျင့် ခံခဲ့ရသည့် ဇာတ်လမ်းကို ဖော်ပြထားပြန်ပါသည်။ ဤဖြစ်ရပ်များမှာ အသေးအဖွဲမျှသာ ရှိပါသေးသည်။ ကြောက်လန့်မှု၊ ရှက်ရွံ့မှုနှင့်တကွ အသက်ရှင်ရေးအတွက် ရုန်းကန်နေရခြင်း သက်သက်ကြောင့် အသက်ရှင်ကျန်ရစ်သူ အများအပြားမှာ ထုတ်မပြော ရဲရှာကြပေ။
ဘော့စနီးယားမှသည် ရဝမ်ဒါအထိ အဓိကရ ပဋိပက္ခတိုင်း လိုလိုတွင် လိင်မှုကိစ္စ အကြမ်းဖက်မှုအား စစ်လက်နက် တစ်ခုအဖြစ် အသုံးပြုခဲ့ကြပါသည်။ ယင်းမှာ နိုင်ငံရေး ရည်မှန်းချက်များကို ဖော်ဆောင်ရန် ဖြစ်စေ၊ နိုင်ငံရေးအရ ပြိုင်ဘက်များကို အရှက်ခွဲရန် ဖြစ်စေ၊ မတူကွဲပြားသော တိုင်းရင်းသား လူမျိုးစုအုပ်စုကို မောင်းထုတ်ရန် သို့မဟုတ် မလှန်နိုင်အောင် ချိုးနှိမ်ရန် ဖြစ်စေ၊ ရပ်ရွာ အသိုင်းအဝိုင်းတစ်ခု ကျိုးနွံ နာခံသွားစေရေးအတွက် အကြမ်းဖက် ခြိမ်းခြောက်ရန် ဖြစ်စေ တမင်ရည်ရွယ် ဆောင်ရွက်သော စစ်ရေးနည်းဗျူဟာ တစ်ရပ်အဖြစ် အသုံးပြုသော အကြမ်းဖက်မှုပင် ဖြစ်ပါသည်။ ပဋိပက္ခ အချို့တွင် အမျိုးသမီးများအား အိပ်ခ်ျအိုင်ဗီရောဂါ ကူးစက်သွားစေရန် ဖြစ်စေ၊ မြုံသွားပြီး ကလေးမရနိုင်တော့သည်အထိ အလွန် ပြင်းထန်စွာ အနာတရ ဖြစ်စေရန်အထိ မုဒိမ်းမှုကို အသုံးပြုကြပါသည်။
မုဒိမ်းမှုမှာ အလွယ်တကူ ဖုံးကွယ်ထားနိုင်သလို ဘေးအန္တရာယ် ကျရောက်ရန် အလွယ်ကူဆုံး ဖြစ်သဖြင့် အင်အား အချည့်နဲ့ဆုံး သူများအပေါ် ကျူးလွန်လေ့ ရှိကြပါသည်။ ကွန်ဂို ဒီမိုကရက်တစ် သမ္မတနိုင်ငံသို့ ကျွန်ုပ်တို့ သွားရောက်ခဲ့ကြစဉ်က ကျူးလွန်ခံထားရသည့် ငါးနှစ်သမီးအရွယ် သမီးငယ်၏ မိခင်တစ်ဦးကို တွေ့ဆုံခဲ့ရပါသည်။ အဆိုပါ သမီးငယ်မှာ သူ့အဖြစ်ကို ပြန်ပြောပြနိုင် လောက်သည့် အသက်အရွယ်ကို မရောက်အောင်ပင် ငယ်လွန်းလှသေးသည်။ ထိုသမီးငယ်၏ ဒုက္ခဝေဒနာနှင့်တကွ ကမ္ဘာအရပ်ရပ်မှ အလားတူ ခံစားခဲ့ရသူ အခြားသားကောင် သန်းပေါင်းများစွာ၏ ဒုက္ခဝေဒနာများကား ဤကိစ္စအတွက် အရေးယူ ဆောင်ရွက်ရန် တပ်လှန့်လိုက်ခြင်း တစ်ရပ်သာ ဖြစ်သင့်ပါသည်။
လူအများအပြား တစ်ပြိုင်နက်တည်း သေကျေဒဏ်ရာ ရစေသော စစ်လက်နက် ခဲယမ်းများနှင့် မြေမြှုပ်မိုင်းဗုံးများကို တရားမဝင်ကြောင်း ကြေညာရန် အတွက်ဖြစ်စေ၊ တရားမဝင် လက်နက်များ ရောင်းဝယ် ဖောက်ကားခြင်းကို နှိမ်နင်းရန်ဖြစ်စေ ကမ္ဘာကြီးသည် နိုင်ငံတကာ သဘောတူ စာချုပ်များကို ဖန်တီးရေးဆွဲ ခဲ့ကြပါသည်။ တစ်ချိန်ကမူ အဆိုပါ သဘောတူညီချက်မျိုးများကို ရရှိနိုင်လိမ့်မည်ဟု မယူဆခဲ့ကြပါ။ လူ့ကျင့်ဝတ်အရ နာကြည်းမှုဖြင့် စတင်ခဲ့ပြီးနောက် တစ်ကမ္ဘာလုံး အတိုင်းအတာဖြင့် ထိုကိစ္စများကို အရေးယူ ဆောင်ရွက်ရန် ဖြစ်လာစေခဲ့ပါသည်။ စစ်မက် ဖြစ်ပွားနေ သည့် ဒေသအတွင်းမှ မုဒိမ်းမှုနှင့် လိင်မှုကိစ္စ အကြမ်းဖက်မှုများကို တွန်းလှန် တိုက်ဖျက်ရန် အတွက်လည်း အလားတူ ဆောင်ရွက်ရမည့် အချိန်သို့ ကျရောက်နေပါပြီ။
ဤပြဿနာ၏ အဓိကအချက်မှာ မည်သည့်နိုင်ငံ တစ်နိုင်ငံတွင်မဆို မုဒိမ်းမှု ထောင်သောင်းပေါင်းများစွာ ရှိနေသည့်တိုင် တရားစွဲဆို အရေးယူမှုက လက်တစ်ဆုပ်စာမျှသာ ရှိနေခဲ့ပြီး အပြစ်ပေး ဒဏ်ခတ် မခံရသော အစဉ်အလာ တစ်ရပ်က အရိုးစွဲ နေသောကြောင့်ပင် ဖြစ်ပါသည်။ ဆီးရီးယား နိုင်ငံရှိ ထိန်းသိမ်းရေး စခန်းထဲမှ အကျဉ်းသားများအား အဓမ္မပြုကျင့် နေကြသူများသည် သူတို့ အရေးယူ မခံရနိုင်ဟု ယူဆကြပါသည်။ အကြောင်းကား သမိုင်းတွင် ထိုအတွက် အရေးယူ မခံခဲ့ကြရသောကြောင့်ပင်တည်း။ နောက်ထပ် အရေးကြီးသော အချက်မှာ မိမိတို့အား မတရားပြုကျင့် ခဲ့ကြသူများ၏ လက်တွင် ဒုက္ခပေါင်းစုံ ခံစားရခြင်းအပြင် တစ်ဘဝလုံး အပယ်ခံရခြင်း၊ နာမကျန်းခြင်းနှင့် စိတ်ဒဏ်ရာ ရခြင်းတို့ကို ရင်ဆိုင်ကြရသော အသက်ရှင် ကျန်ရစ်သူများအတွက် ရေရှည်ပံ့ပိုးမှု မရှိခြင်းတို့ပင် ဖြစ်လေသည်။
အသက်ရှင် ကျန်ရစ်သူများနှင့် သူတို့ မိသားစုများ၏ ဘဝကို လိင်မှုကိစ္စ အကြမ်းဖက်မှုက ဖွတ်ဖွတ်ညက်ညက် ကြေသွားစေပုံကို ကျွန်ုပ်တို့နှစ်ဦးစလုံး တွေ့မြင်ခဲ့ရသည့်အတွက် ဤအရေးကိစ္စအတွက် စည်းရုံး လှုံ့ဆော်ရန် ပေါင်းစည်းခဲ့ကြခြင်း ဖြစ်ပါသည်။ အရေးယူ ဆောင်ရွက်ရန် အပူတပြင်း လိုအပ်နေမှုအား အများသိရှိလာအောင် ကျွန်ုပ်တို့ ဆောင်ရွက်လိုပါသည်။ ထို့အပြင် စစ်မက်ဖြစ်ပွားနေသည့် ဒေသအတွင်းမှ မုဒိမ်းမှုကို အမြစ်ပြတ် ချေမှုန်းရန်မှာ အသက်တမျှ အရေးကြီးလှသော ဦးစားပေး တစ်ရပ်အဖြစ် ဆောင်ရွက်ရေး အတွက် စည်းလုံးကြရန် ကမ္ဘာအရပ်ရပ်မှ အစိုးရများကို ကျွန်ုပ်တို့ တိုက်တွန်း နှိုးဆော်လျက် ရှိပါသည်။
ကျွန်ုပ်တို့၏ ဆောင်ရွက်ချက်ကို ယမန်နှစ်က စတင်ခဲ့ပြီး နိုင်ငံ အများအပြားက ဤကိစ္စအပေါ် တုံ့ပြန်ခဲ့ပုံအတွက် ကျေးဇူး ဥပကာရ တင်ရှိရပါသည်။ ဧပြီလတွင် လန်ဒန်မြို့၌ ကျွန်ုပ်တို့၏ နိုင်ငံ နှစ်နိုင်ငံ အပါအဝင် ရှစ်နိုင်ငံ အုပ်စု (G-8) သည် ဤအရေးကိစ္စကို ကိုင်တွယ် ဖြေရှင်းရန် သမိုင်းဝင် ကတိကဝတ် တစ်ရပ်ကို ပြုလုပ်ခဲ့ကြပါသည်။ ဇွန်လတွင် ကုလသမဂ္ဂ လုံခြုံရေးကောင်စီက ကုလသမဂ္ဂ၏ စွမ်းရည်များကို အထောက်အပံ့ပြုသော ဆုံးဖြတ်ချက် တစ်ရပ်ကို တစ်ခဲနက် ချမှတ်ခဲ့ကြပါသည်။ ကုလသမဂ္ဂ အဖွဲ့ဝင် ၄၅ နိုင်ငံက အဆိုပါ ဆုံးဖြတ်ချက်ကို ပူးတွဲ အာမခံပေးခဲ့ခြင်းအားဖြင့် ယင်းတို့၏ ထောက်ခံမှုကို ပြသခဲ့ကြပေရာ မကြာသေးခင်က သမိုင်းတွင် မှတ်တမ်းတင်ရမည်သာ ဖြစ်ပေသည်။
လာမည့် ရက်သတ္တတစ်ပတ်၌ နယူးယောက်မြို့တွင် ကမ္ဘာ့ခေါင်းဆောင်များ အများဆုံး စုဝေးရာဖြစ်သော ကုလသမဂ္ဂ အထွေထွေ ညီလာခံ ကျင်းပသွားပါမည်။ အဆိုပါ ညီလာခံ ကျင်းပနေစဉ်အတွင်း စက်တင်ဘာလ ၂၄ ရက်နေ့တွင် ‘ပဋိပက္ခအတွင်း လိင်မှုကိစ္စအရ အကြမ်းဖက်မှု ဆုံးဖြတ်ရန် သန္နိဋ္ဌာန် ချမှတ်မှု ကြေညာစာတမ်း’ ကို တင်ဆက်သွားပါမည်။
အဆိုပါ ကြေညာစာတမ်းကို လိင်မှုကိစ္စအရ အကြမ်းဖက်မှု ကိစ္စနှင့် စပ်လျဉ်းသော ကုလသမဂ္ဂ အထွေထွေ အတွင်းရေးမှူးချုပ်၏ အထူးကိုယ်စားလှယ်နှင့်တကွ ဤအရေးကိစ္စတွင် ကျွန်ုပ်တို့နှင့်အတူ ပူးပေါင်း တိုက်ဖျက်သွားရန် ရဲရင့်စွာ သဘောတူညီခဲ့ကြသည့် အရှေ့အလယ်ပိုင်း၊ ဥရောပ၊ အာဖရိကနှင့် အာရှတို့မှ ခေါင်းဆောင်များ ၏ နိုင်ငံပေါင်း တစ်ဒါဇင်ခန့်က ရေးဆွဲခဲ့ကြပါသည်။ ဤအရေး ကိစ္စတွင် မိမိတို့ မည်သည့်နေရာမှ ရပ်တည်နေသည် ဆိုခြင်းကို ပြသရန် အခွင့်အလမ်း တစ်ရပ်အား အဆိုပါ ကြေညာစာတမ်းက နိုင်ငံတိုင်း ကို ပေးအပ်သွားပါလိမ့်မည်။
ပဋိပက္ခအတွင်း လိင်မှုကိစ္စအရ ပြင်းထန်သော အကြမ်းဖက်မှုသည် ဂျနီဗာ လုပ်ထုံးလုပ်နည်းများကို ပြောင်ပြောင်တင်းတင်း ဖောက်ဖျက်ရာ ရောက်ကြောင်း အဆိုပါ ကြေညာစာတမ်းကို အတည်ပြု လက်မှတ် ရေးထိုးကြသော နိုင်ငံများက ပထမဆုံး အကြိမ်အဖြစ် သဘောတူကြ ပါလိမ့်မည်။ ထိုသို့သဘောတူသည့်အတွက် မသင်္ကာသူများကို ကမ္ဘာ့ မည်သည့်နေရာ သို့မဆို ရောက်ရှိနေသည် ဖြစ်စေ ဖမ်းဆီးနိုင်မည်ဟု ဆိုလိုပါသည်။
အဆိုပါ ရာဇဝတ်မှုများကို ဖုံးကွယ် မထားနိုင်တော့စေရန်နှင့် တာဝန်ခံမှု၊ တာဝန်ယူမှုများ ရှိလာရတော့မည် ဖြစ်ကြောင်း တပ်မတော် ခေါင်းဆောင်များ သဘောပေါက်လာစေရန် ငြိမ်းချမ်းရေး သဘောတူညီချက်များတွင် လိင်မှုကိစ္စအရ အကြမ်းဖက်မှုများအား လွတ်ငြိမ်းချမ်းသာခွင့် ပေးခြင်းကို ခွင့်မပြုရေးအတွက် ကတိကဝတ် တစ်ရပ်လည်း အဆိုပါ ကြေညာစာတမ်းတွင် ပါဝင်ပါသည်။
ကြေညာစာတမ်းက ၂၀၁၄ ခုနှစ် နှစ်လယ်တွင် အပြည်ပြည်ဆိုင်ရာ လုပ်ထုံးလုပ်နည်း အသစ်တစ်ရပ်ကို ဖော်ဆောင်သွားမည်ဟု ကတိပြုထားပါသည်။ အဆိုပါ လုပ်ထုံးလုပ်နည်းက ပြဆိုသော သက်သေ အထောက်အထားသည် တရားရုံးတွင် ခိုင်လုံနေစေပြီး အသက်ရှင် ကျန်ရစ်သူများမှာလည်း တရားမျှတမှုကို ပိုမိုမြင်တွေ့လာရစေမည့်အပြင် စစ်မက် ဖြစ်ပွားနေသော ဒေသများမှ မုဒိမ်းမှုနှင့် အခြားလိင်မှု ကိစ္စအရ ရာဇဝတ် ပြစ်မှုများအား စုံစမ်းစစ်ဆေးသည့် အခါတွင် ခံလိုက်ရသူ သားကောင်များ၏ ဘေးအန္တရာယ် ကင်းရှင်းရေးနှင့် ဂုဏ်သိက္ခာတို့အား အဓိက ထားစေရေးအတွက် ကူညီပံ့ပိုးပေးရန် ဖြစ်ပါသည်။
ယင်းတွင် အမျိုးသမီးများ၏ ပါဝင် ဆောင်ရွက်မှု၊ ဒုက္ခသည်များအား ကာကွယ် စောင့်ရှောက်ရေး၊ နိုင်ငံများ၏ တပ်မတော်နှင့် ရဲတပ်ဖွဲ့တို့ကို လေ့ကျင့် သင်ကြားပေးရေးတို့နှင့် စပ်လျဉ်းသော ပြဋ္ဌာန်းချက်များလည်း ပါဝင်ပါသည်။
အဆိုပါ ကြေညာစာတမ်းအား လက်မှတ်ရေးထိုးသော နိုင်ငံ များသည် ယင်းတို့၏ ပဋိပက္ခနှင့် လူသားချင်း စာနာထောက်ထားမှုဆိုင်ရာ လုပ်ငန်းများ အားလုံး၏ ရှေ့တန်းတွင် လိင်မှုကိစ္စအရ အကြမ်းဖက်မှုအား အကာအကွယ် ပေးခြင်းကို ထားရှိရန်၊ အဆိုပါ အကြမ်းဖက်မှု အန္တရာယ် အကြီးဆုံး ဖြစ်နေသည့် နိုင်ငံများ၏ စွမ်းရည်များ တောင့်တင်း ခိုင်မာလာစေရေးအတွက် ကူညီပံ့ပိုးပေးရန်လည်း ကတိပြုကြ ပါလိမ့်မည်။
ဤသည်တို့ အားလုံးမှာ နိုင်ငံတကာ အသိုင်းအဝိုင်း၏ အဖွဲ့ဝင်တိုင်း ထောက်ခံသင့်သော အဆင့်များသာ ဖြစ်သည်ဟု ကျွန်ုပ်တို့ ယုံကြည်ပါသည်။ သို့ဖြစ်ပေရာ ဤသဘောတူညီချက်ကို ကမ္ဘာ့အစိုးရ အများစုက လက်မှတ် ရေးထိုးကြမည်ဟု လည်းကောင်း၊ အဆိုပါ ကတိကဝတ်များကို လက်တွေ့အကောင်အထည် ဖော်နိုင်ရန် ကျွန်ုပ်တို့အားလုံး ပူးပေါင်းဆောင်ရွက် နိုင်ကြလိမ့်မည်ဟု လည်းကောင်း ကျွန်ုပ်တို့ မျှော်လင့်မိပါသည်။ ကျွန်ုပ်တို့ ဆောင်ရွက်နိုင်မည် ဆိုပါက ဤကြေညာ စာတမ်းသည် မုဒိမ်းမှုနှင့် လိင်မှုကိစ္စအရ အကြမ်းဖက်မှုတို့အပေါ် အပြည်ပြည်ဆိုင်ရာ သဘောထားများ၌ အလှည့်အပြောင်း တစ်ရပ်ကို ဖော်ဆောင် သွားနိုင်လိမ့်မည် ဖြစ်သလို အပြစ်ပေးဒဏ် ခတ်ခံရခြင်းမှ ကင်းလွတ်နေမှုအား အဆုံးသတ်ခြင်း၏ နိဒါန်းတစ်ရပ်လည်း ဖြစ်သွားပါလိမ့်မည်။
ကမ္ဘာကြီးအနေနှင့် မလွဲမသွေ ရင်ဆိုင်ရမည့် အခြားသော တရားမမျှတမှုများ အများအပြား ရှိပါသည်။ သို့ရာတွင် အမျိုးသမီး၊ အမျိုးသားနှင့် ကလေးသူငယ် ထောင်သောင်းများစွာအပေါ် မုဒိမ်းမှုနှင့် အခြား အကြမ်းဖက်မှုများကိုမူ သည်းမခံနိုင်တော့ပါ။ ကမ္ဘာတစ်လွှားမှ လူသား အပေါင်းတို့က ဤရပ်တည်ချက်အတိုင်း ရပ်တည်ကြရန် ကျွန်ုပ်တို့နှင့် ပူးပေါင်း လာကြမည်ဟု ကျွန်ုပ်တို့ မျှော်လင့်မိပါသည်။
The Voice Weekly
