ပြည်သူများအနေဖြင့် နိုင်ငံတကာနည်းတူ မိုဘိုင်းဖုန်းလိုင်း ကတ်အား အခမဲ့ရရှိသင့်ပြီး ထိုသို့ဖြစ်လာရန် Business Model ကို ပြောင်းလဲပစ်ရမည်ဟု ဦးသောင်းတင်က ပြောကြား

ပြည်သူများအနေဖြင့် နိုင်ငံတကာနည်းတူ မိုဘိုင်းဖုန်းလိုင်းကတ် တစ်ခုအတွက် ငွေကြေးကုန်ကျမှု မရှိဘဲ အလကားရရှိသင့်ပြီး ဆက်သွယ်ရေးလုပ်ငန်း ၀န်ဆောင်မှုပေးသူများ အနေဖြင့် Business Model ကိုပြောင်းလဲပစ်ရမည်ဟု MICTDC ၌ ကျင်းပပြုလုပ်ခဲ့သည့် အလုပ်ရုံဆွေးနွေးပွဲတွင် KMD ကွန်ပျူတာ ကုမ္ပဏီ၏ဥက္ကဌဖြစ်သူ ဦးသောင်းတင်က ထည့်သွင်း ပြောကြားခဲ့သည်။ “လူဦးရေရဲ့ ၅ ရာခိုင်နှုန်း လောက်ပဲ ဖုန်းရှိသေးတယ်ဆိုတာ က ဖုန်းမရှိသေးသူ ၉၅ ရာခိုင်နှုန်း ဖြစ်တဲ့အတွက် အခွင့်အလမ်းတွေရှိ နေသေးတယ်ဆိုတဲ့ သဘောပါ။ ဒီ နေရာမှာ ကျွန်တော်တို့အနေနဲ့ သူများတကာနဲ့ယှဉ်ရင် နောက်ကျကျန် ခဲ့တယ်ဆိုပေမယ့် ဒါကလည်း အသုံးချတတ်မယ်ဆိုရင် ပိုမြင့်မားတဲ့ နည်းပညာ၊ ပိုကောင်းမွန်တဲ့နည်း လမ်းကိုရွေးချယ်သုံးစွဲနိုင်တဲ့ အခွင့်အလမ်းရှိနေပါတယ်။ ဒီနေ့ခေတ်က Steve Jobs ပြောခဲ့သလိုပဲ ပီစီအလွန်ခေတ်ကို ရောက်လာပြီး အင်တာနက်သုံးနိုင်တဲ့ မိုဘိုင်း ပစ္စည်းတွေရဲ့ခေတ်ပါ။ အဓိက တွေ့ရမှာက ဖုန်းနဲ့ Tablet တွေပေါ့။ တစ်ခုသတိပြုရမှာက သူများနိုင်ငံမှာ မသုံးတော့တဲ့ နည်းပညာဟောင်းပစ္စည်းတွေကို မ၀ယ်မိဖို့ပါ။ 2G ကိုမသွားသင့်တော့ဘဲ 3G ကနေ စနိုင်ရမယ်။ ၀န်ကြီးက 3G အောက်ကိစ္စဆိုရင် မပြောနဲ့ဆိုလို့ တော်တော် အားတက်သွားတယ်။ ဆင်းကတ်တန်ဖိုးဆိုရင်လည်း ကျပ် ၅၀၀၀ တောင် မဟုတ်ဘူး။ ဆင်းကတ်အလကားဖြစ်ရမယ့် အပြင် ၀ယ်ယူသူတွေကို မိနစ် ၂၀၀ အလကား ဆက်ခွင့်ပြုတာမျိုး၊ ဟန်းဆက်တစ်လုံး လက်ဆောင်ပေးတာမျိုးထိ ဖြစ်သင့်တာပါ။ အဲဒီအတွက် လည်း Business Model ကိုပြောင်းပစ်ဖို့လိုပါမယ်။ ဘတ်စ်ကားစီးတဲ့ သူတစ်ယောက်ဟာ ကားစီးခကိုပဲ ပေးရတာပါ။ ဘတ်စ်ကားဖိုးပေးစရာ မလိုပါဘူး။ ဒီလိုပဲ ကွန်ပျူတာ ပစ္စည်းရောင်းတာနဲ့ ကွန်ပျူတာ သင်တန်းကျောင်းတို့ရဲ့ ပုံစံချင်းမတူပါဘူး။ ကွန်ပျူတာပစ္စည်း ရောင်းရင် ၀ယ်ရင်းထားရတဲ့ ပစ္စည်းတစ်ခု အတွက်ချက်ချင်း အမြတ်လိုချင်ပေမယ့် ကွန်ပျူတာ သင်တန်းကျောင်းမှာတော့ ရင်းထားရတဲ့ ပစ္စည်းဖိုးကို ချက်ချင်းကျေချင်လို့မရပါဘူး။ ဒီသဘောပါပဲ။ မိုဘိုင်းဖုန်း ကုမ္ပဏီအနေနဲ့လည်း ကာလတစ်ခုထိ ရင်းနှီးမြှုပ်နှံရမှာဖြစ်ပြီး ရေရှည်ဝန်ဆောင်မှု ပေးသွားရမယ့် ကိစ္စမျိုးပါ”ဟု KMD ကုမ္ပဏီ ၏ CEO ဦးသောင်းတင်က အလုပ်ရုံဆွေးနွေးပွဲတွင် ပြောကြားခဲ့သည်။ မြန်မာနိုင်ငံ၏ တယ်လီဖုန်း သိပ်သည်းဆမှာ ၅.၆ ရာခိုင်နှုန်း ရှိလာပြီး လူ ၁၀၀ လျှင် ၅.၆ ဦး မှာ တယ်လီဖုန်း ကိုင်ဆောင်နိုင်ကြောင်း သိရသည်။ လူဦးရေနှင့် တယ်လီဖုန်း အရေအတွက်တို့ အချိုးအစားအရ နေပြည်တော်မှာ တယ်လီဖုန်း သိပ်သည်းဆ အမြင့်မားဆုံးဖြစ်ပြီး ရန်ကုန်တိုင်းဒေသကြီးမှာ ဒုတိယအမြင့်ဆုံးဖြစ်ကြောင်း သိရသည်။ ref: ELEVEN