Saturday, October 19, 2013

မန္တလေးတွင် သွေးလွန်တုပ်ကွေးကြောင့် ကလေး ၁၀ ဦးခန့် သေဆုံး

0 comments

FROM: The Voice Weekly

မန္တလေး၊ အောက်တိုဘာ ၁၇

မိုးရာသီနောက်ပိုင်းကာလ ကလေးအများစုတွင် ဖြစ်ပွားလေ့ ရှိသည့် သွေးလွန်တုပ်ကွေး ရောဂါကြောင့် မန္တလေးခုတင် ၅၅၀ ဆံ့ ကလေးဆေးရုံသို့ ကလေးငယ်ပေါင်း ၁၅၀၀ ခန့် လာရောက် ကုသခဲ့ရာ ယင်းအနက် ၁၀ ဦးခန့် သေဆုံးခဲ့ကြောင်း အဆိုပါ ဆေးရုံအုပ်ကြီး ဒေါက်တာစိန်ဟန်က The Voice သို့ အတည်ပြု ပြောကြားသည်။“ဒီနှစ် ဇန်နဝါရီလကစပြီး လက်ရှိ အောက်တိုဘာလ ဒုတိယပတ်အထိ သေဆုံးတဲ့ကလေး ၁၀ ဦးခန့် ရှိခဲ့ပါတယ်” ဟု ၎င်းကဆိုသည်။သွေးလွန်တုပ်ကွေးရောဂါ ဖြစ်ရသည့် အကြောင်းမှာ ရေကြည်ရေသန့်မှ ပေါက်ဖွားသည့်ခြင်များ ကိုက်ခံရ၍ ဖြစ်ပြီး ယင်းခြင်မှာ နေ့ခင်းဘက် များတွင် အကိုက်များသည့် ခြင်များ ဖြစ်ကြောင်း အဆိုပါ ဆေးရုံအုပ်ကြီးက ရှင်းပြသည်။
သွေးလွန်တုပ်ကွေး ရောဂါမှာ သုံးရက်မှငါးရက်အကြား စိုးရိမ်ရသော ရောဂါဖြစ်ပြီး တစ်ပတ်အတွင်းသာ ကုသရသည့် အခြေအနေ ဖြစ်ကြောင်း ကိုယ်ပူချိန်လျော့ခြင်း၊ သွေးယိုခြင်းများ ဖြစ်လျှင် ကလေး ၁၀ ဦးတွင် နှစ်ဦးမှာ အသက်အန္တရာယ် ပိုမိုများပြားသည်ကို တွေ့ရှိရကြောင်း ဒေါက်တာစိန်ဟန်က ထပ်မံပြောကြားသည်။ယင်းသွေးလွန်တုပ်ကွေး ရောဂါမှာ နှစ်စဉ်ဖြစ်လေ့ မရှိဘဲ ၂ နှစ်ခြားတစ်ကြိမ် ဖြစ်ပွားလေ့ရှိပြီး လတ်တလော ခုတင် ၅၅၀ ဆံ့ ဆေးရုံသို့ မန္တလေးခရိုင်အတွင်း ပုသိမ်ကြီးမြို့နယ်၊ အမရပူရ မြို့နယ်နှင့် ပြင်ဦးလွင်ခရိုင် မတ္တရာ မြို့နယ်တို့မှ အများဆုံး တက်ရောက်ကုသမှု ရှိကြောင်း ဆေးရုံလူနာမှတ်တမ်းများအရ သိရသည်။မွေးကင်းစလူနာအရွယ်မှ အသက် ၁၂ နှစ်အောက် ကလေးသူငယ်များ သွေးလွန်တုပ်ကွေး အဖြစ်များနေပြီး ယင်းသို့သော သွေးလွန်တုပ်ကွေးရောဂါ ဝေဒနာများ မပေါ်ပေါက်စေရန် ကလေးငယ်များ အိပ်မောကျနေချိန်တွင် ခြင်ထောင်၊ ခြင်သံဆန်ခါများဖြင့် လုံခြုံစွာထားရှိရန် လိုအပ်ပြီး ရောဂါလက္ခဏာ ဖြစ်ကြောင်း တွေ့ ရှိက ဆေးရုံသို့ ချက်ချင်းလာရောက် ကုသကြရန် ဆေးရုံအုပ်ကြီးက အကြံပြု ပြောကြားသည်။

(သန်းဖေသား)

Leave a Reply

 
Shan News © 2011 DheTemplate.com & Main Blogger. Supported by Makeityourring Diamond Engagement Rings

You can add link or short description here