နီကယ်စက်ရုံ အလုပ်သမားများ အကြောင်းပြချက်မရှိ လစာဖြတ်ခံနေရ

ဖေဖော်ဝါရီ(၂၅)

အလုပ်သမားလစာများကိုအကြောင်းပြချက်မရှိ ဖြတ်တောက်နေသည့်တကောင်းတောင်နီကယ်စက်ရုံ

 မြင်ကွင်း (ဓာတ်ပုံ – နန်းသီရိလွင် / ဧရာဝတီ)

စစ်ကိုင်းတိုင်းဒေသကြီး ကသာခရိုင် ထီးချိုင့်မြို့နယ် မောင်းကုန်းကျေးရွာ အုပ်စုရှိ တကောင်းတောင် နီကယ်စက်ရုံရှိ ဒေသခံ အလုပ်သမား များသည် အကြောင်းပြချက် မရှိဘဲ လုပ်ခလစာများ လျှော့ချ ခံနေရကြောင်း သိရသည်။

“ဒီလဆိုရင် လစာလျှော့တာ ၃ လရှိပါပြီ။ တယောက်ကို လစာ စာရင်းထဲကနေ ကျပ် ၈၀၀၀ ကနေ၊ ၁ သောင်းကျော်အထိ လျှော့ချ ခံနေရပါတယ်။ သတ္တုတွေ ရောင်းမထွက်လို့ ဆိုတဲ့ အကြောင်းပြချက် မျိုးတော့ ပြောတယ်” ဟု တကောင်းတောင် နီကယ်စက်ရုံ လေထု သန့်ရှင်းရေး ဌာနမှ မြန်မာ အလုပ်သမား ခေါင်းဆောင် တဦးက ဧရာဝတီကို ပြောသည်။

လစာ လျှော့ချခံနေရမှုနှင့် ပတ်သက်ပြီး ထီးချိုင့်မြို့နယ် အလုပ်သမားရုံးသို့ တိုင်ကြားထားကြောင်း၊ အရေးယူမှု တစုံတရာ မရှိသေးကြောင်း၊ မူရင်းလစာမှ ကျပ် တသောင်းဝန်းကျင်အထိ ရာထူး၊ လစာအလိုက် လျှော့ချခံနေရကြောင်း၊ သို့ရာတွင်  အချို့ ဌာနများ၌မူ လစာအနည်းငယ် တိုးပေးခြင်းများ ရှိနေသည့်အတွက် အလုပ်သမားများ မကျေမနပ် ဖြစ်နေကြကြောင်း သိရသည်။

“လုပ်ငန်းလုပ်တဲ့ အချိန်မှာ သက်သာတဲ့ ဌာနတွေကို လစာ လျှော့ချလိုက် ပြီးတော့ မသက်သာတဲ့၊ အလုပ်များတဲ့ ဌာနတွေ ကို လစာ တိုးပေးလိုက်တာ။ တိုးပေးတဲ့ ဌာနက နည်းနည်းလေးပဲ ရှိတယ်။ လစာ တိုးပေးရမှာကို မပေးဘဲနဲ့ ဒီဘက်ဌာနက လျှော့လိုက်တဲ့ ငွေကို ဟိုဘက်ဌာနမှာ ပြန်သွားပေးတဲ့ သဘောမျိုးဖြစ်နေတယ်” ဟု အလုပ်သမား တဦးက ဆိုသည်။

တကောင်းတောင် နီကယ်စက်ရုံတွင် တရုတ်နိုင်ငံမှ ပညာရှင် အလုပ်သမား ၆၀၀ ကျော်နှင့် မြန်မာဒေသခံ အလုပ်သမား ၈၀၀ ကျော်တို့ဖြင့် လည်ပတ်လျှက် ရှိကြောင်း၊ အလုပ်သမားများကို ရာထူးဌာနအလိုက် အခြေခံလစာ ကျပ် ၆ သောင်းမှ၊ ၁ သိန်း ၄ သောင်း ၄ ထောင် အထိ လုပ်ခလစာ ပေးထားကြောင်း၊ စက်ရုံတွင် မနေသည့် ပြင်ပ အလုပ်သမားများအတွက် နေစရိတ်၊ စားစရိတ်နှင့် သွားလာ စရိတ် ကျပ် ၇၀၀၀၀ ခံစားခွင့် ပေးထားကြောင်း သိရသည်။

“လစာကို ဘယ်လောက် ပေးပါမယ်လို့ စခန့်ကတည်းက အလုပ်ရှင် အလုပ်သမား သဘောတူညီချက် ရှိပြီးသားပါ။ အဲဒါကို ခုလို လျှော့တယ်ဆိုတော့ သဘာဝမကျဘူး။ ကျပ် ၈ ထောင် အလျှော့ခံရတာ ဘယ်လောက်မှ မများဘူး ဆိုပေမယ့် ကျနော်တို့ တကယ့်တကယ် ၀န်ထမ်းဘ၀မှာတော့ တအား နစ်နာတယ်။ ဘာကြောင့်လဲ ဆိုတော့ ၀န်ထမ်းတယောက်ရဲ့ အိုဗာတိုင် ကြေးက လစာမူရင်းအပေါ် မူတည် တွက်ရတဲ့အခါ ၈ ထောင်ဆိုတဲ့ ငွေကြေးဟာ အတော် တာသွားပါတယ်” ဟု အလုပ်သမား ခေါင်းဆောင် တဦးက ဧရာဝတီကို ပြောသည်။

စက်ရုံ အလုပ်သမား များအား လုပ်ခလစာ လျှော့ချခံနေရခြင်းနှင့် ပတ်သတ်ပြီး တကောင်းတောင် နီကယ်စက်ရုံ လည်ပတ်နေသည့် Myanmar CNMC co,Ltd သို့ ဆက်သွယ် မေးမြန်းခဲ့ရာ ပြန်လည် ဖြေကြားခြင်း မရှိခဲ့ပေ။

တကောင်းတောင် နီကယ်စက်ရုံကို တရုတ်နိုင်ငံ ကုမ္ပဏီတခု ဖြစ်သော China Nonferrous Metal Mining Group (CNMC) က လုပ်ကိုင်ခွင့် ရရှိထားပြီး ၂၀၁၁ ခုနှစ် မတ်လ ၂၇ ရက်နေ့တွင် စတင် လည်ပတ်ခဲ့သည်။ တကောင်းတောင် နီကယ် သတ္တုတွင်းမှ တနှစ်လျှင် နီကယ်သတ္တုရိုင်း တန်ချိန် ၁ ဒဿမ ၉၇ သန်း ထွက်ရှိကာ ဖယ်ရိုနီကယ် ကျိုချက်စက်ရုံမှ တနှစ်လျှင် ၈၄,၄၉၅ တန် ထုတ်လုပ် နေကြောင်း သိရသည်။

ဧရာဝတီ